വഴിയാത്രക്കാരന്‍.......
======================

മനസ്സൊരു കടലാസുതോണി....
വിദൂരസ്മൃതികളുടെയും, നിഗൂഡദു:ഖങ്ങളുടെയും,
പാപഭാരം പേറി അലയാന്‍ വിധിക്കപ്പെട്ട്,
അണയാന്‍ ഒരുതീരമില്ലാതെ, 
ആഴക്കടലിലുപേക്ഷിക്കപ്പെട്ട വെറുമൊരു കടലാസുതോണി....!

പീഡിതമായോരു ആത്മാവ് .....
വിജനമായ വഴികള്‍ പിന്നിട്ട്,
തളര്‍ന്നുറങ്ങാന്‍ ഒരു മരത്തിന്‍റെ തണല്‍ തേടിയലഞ്ഞു...!
വഴിവക്കിലൊരു മരമതിന്‍ ഇലകള്‍ കൊഴിഞ്ഞ്...,
നഗ്നമാം കൊമ്പുകളുമതിന്‍ കരിഞ്ഞചില്ലകളുമായി,
ആകാശംനോക്കി നിശബ്ദമായി കരയുന്നത് ഞാന്‍ കണ്ടു...!

വഴിതെറ്റിയെത്തിയാ ഉഷ്ണക്കാറ്റില്‍-
കൊഴിഞ്ഞോരായിലകള്‍ പറന്നുപൊങ്ങിയാകാശ-
വിസ്മൃതിയില്‍ ആണ്ടുപോകുന്നതും ഞാന്‍ കണ്ടു....!

ഇനിയുമൊരുപാട് ദൂരം താണ്ടണമെനിക്കീ -
വഴി വളവും തിരിവുമായ്....!
പല നാടുകള്‍, നഗരങ്ങളെന്നിലെ- 
വഴിയിലെയോരോ ഇടത്താവളം...!
ലക്ഷ്യമിതൊന്നുമാത്രം എന്‍റെ , 
കര്‍മ്മബന്ധത്തിന്‍റെ ഗന്ധം ചുരത്തുന്ന മണ്ണ്….!
ആ ഗന്ധത്തില്‍ നിന്നെന്‍റെ ഓര്‍മ്മകള്‍ ഉണരുന്നൂ…..
ഉണര്‍ന്നോരാ ഓര്‍മ്മകളില്‍ ഞാന്‍ പുനര്‍ജ്ജനിച്ചു....!

=========================
അജയ്മാധവ്-ശൂരനാട്
26/06/2014 , Fujairah , U.A.E

( ഫോട്ടോ കടപ്പാട് : ശ്രീ. ശ്രീകുമാര്‍ വാര്യര്‍ )